العيد عيدنا

هنعيد هنعيد .. العيد عيدنا وهنعيد ..

كل سنة وانتوا طيبين يا جدعان ، وسنة سعيدة عليكو يا رب ، والسنة الجاية تكونوا فى أي حتة ..

أخيرا العيد وصل يا رجالة ..

والله كنا نسينا الفرحة بقالنا فترة .. لكن خلاص العيد جه والحياة بقا لونها بمبى ..

العيد يا جماعة .. انتوا فاكرين الكلمة دي وللا نسيتوها .. لأ وإيه كمان العيد الكبييييييير .. يعني مش أي حاجة .. أصل الكبير كبير برضه .. والنص نص نص نص .. والصغير منعرفوش ..

زمان واحنا صغيرين كان العيد شكل تاني .. فرحة العيد كانت قماشة تانية .. لعب بقا وصواريخ وبمب وبلالين .. ومحدش ينسى خروف العيد .. عشان لكل فيلم بطل . وبطل فيلم العيد الكبير هو الخروف ..

العيد زمان كان إنك تشوف أصحابك وتخرجوا تلعبوا مع بعض وتروحوا تاكلوا من عند عبده تلوث .. وتتنططوا فى كل حتة ..

يا جدعان احنا فى العيد ده كنا بنعمل كل حاجة من الآخر ..

وكله إلا ليلة العيد بقا .. مجهز الطقم الجديد أو بدلة الظابط من بالليل .. وسهران طول الليل جنب البدلة عمال أبصلها وبحلم إن النهار يطلع عشان أحقق الحلم التاريخي وألبسها .. وأتخيل نفسى وأنا عمال أجرى يمين وشمال ببدلة الظابط .. والحرامية يشوفوني يترعبوا ويهربوا من قدامي ..

ولما النوم يغلب عنيا أنام وأصحى على صوت الحاجة وهي بتصحيني يللا يا أحمد العيد جه .. جه منين ؟ مش عارف .. وألاقي أخويا بقا يللا يا احمد النهاردة العيد .. وأنا أصحى من النوم مش مصدق إننا يوم العيد .. بجد احنا يوم العيد يا جدعان .. أيوا الله العظيم النهاردة العيد انت مش سامع وللا إيه ؟

أروح أنا مركز شوية أسمع صوت جميل بيقول ..

الله الله الله أكبر .. لا إله إلا الله .. الله أكبر الله أكبر ولله الحمد .. الله أكبر كبيرا والحمد لله كثيرا وسبحان الله بكرة وأصيلا .. لا إله إلا الله وحده صدق وعده ونصر عبده وأعز جنده وهزم الأحزاب وحده ..

وبعدين نروح نصلى العيد بقا فى الساحة الواسعة .. وطول الطريق عمالين نكبر ونمشى من طريق غير اللى هنرجع منه طبعا عشان دي السنة .. ونوصل للساحة نلاقى أمم .. إيه يا جدعان الناس دي كلها .. كانوا فين دول ؟ المهم .. أفضل ماشي ماشي ماشي ولا بيدي على رأي حليم لحد ما أوصل قدام خالص عشان أبقى قريب من الإمام .. ونقعد نكبر تاني .. لحد ما الإمام يقول : قوموا إلى صلاتكم يرحمكم الله ..