ممنوع السعاده

الكلمه صارت بارود
الدم فستانها
والنخل طارح جروحْ
الآهه بستانها
والنار بتطْفى المَيّه قُدامها
وِتِروى الشرْ
وسنين تُمُرْ
والذُّلّ يِكبر ع الجبينْ
أصلُه رِضعْ م المُرّ
آه ..
وِانكسرْ
صوت السكون
خايف بيصرخ من بعيد
والقمرْ عايشْ وحيدْ
وِسْط المطرْ والرعد والغيمهْ
عايشْ ومشْ عايشْ
عُكَّازُه منْ عَضْمُه
والصّمت موَّالُه
وعْيونُه مفخُوتَه
مع إنه بينوّرْ
مع إنه تايهْ من زمانْ
على عِشُّه بيْدوّرْ
ليهْ
ليه الشجنْ ذنبُه
ليه الشجنْ ذنبي

والدموع
والشموع في العتمه منا بتختفي
وبدون رجوع
والأمان يتغلب .. يتقلب جبن وخداع
ليه البكا
لاجل صاحبْ ندلْ باعْ
ليه نبيع الحق من غير تمنْ
والحق صاحب جدعْ
واقف معاك وقت الضياع
واقف معاكْ زى الجبلْ
لكن خسا ره وميت خسا ره
الكل باعْ
الكل ضاعْ
باع الحقيقه وضاع الأملْ
أيْوه



أيوه المطر جارحْ
وبيعوّرْ
والبشر أنيابْ
بتتهوّرْ
والنور بيدبحْ في العيونْ
يحرقْ جفونْ
يِفضح الليل الجميلْ
ينبش قبور الساهرين
يسرق الحلم البريء
ويصحَّى فينا الوهم تانى
أيوه
أيوه البشر فيهم رِعاعْ
باعوا ضميرهم للخسيسْ
وانحنوا لغير الإلهْ
والتمنْ
كان الخنا ويّا الوهنْ
حتى استباحوا الطفل في ضىِّ القمرْ
والرجال تحت النِّسا
والمطر زي الفؤوسْ
فوق الرؤوسْ
ضعفِ النفوسْ
خلَّى الوليدْ عِريانْ تآسى صرختهْ
والبرد قطَّع جتّته
والقلمْ واقفْ غريبْ
ع السطر تنزفْ دمعتهْ
يشكى ويروى قصتهْ
قصة ألمْ
قصة دموع خانها الندمْ
قصة ضميرْ قتلوه لئام
والحُب خانْ
شافِ اللي كانْ
لكنْ سِكِتْ
أيوَه سكتْ
والفُجْر أعلى مِ السُّكوتْ
والغدر عشِّشْ في البيوتْ
الحب فينا اخْتار ْيِموتْ
راحْ يِنتَحَرْ
أيوه انْتحرْ
أيوه يا زمن العجبْ
مال البشرْ
مال الحجرْ
مالْ كل عابد مالْ
زَىِّ البقرْ
وِالكلْ باعْ
الكلْ ضاعْ
باعِ الحقيقَه وْضَاعِ الأملْ
أيْوهْ


بسْ لكنْ
الحقيقه بتنكتبْ
رغم انّها لابْسه الكفنْ
لاجْلِ البشرْ مايِحْمِلوها
يِدْفنوها
فى ذكْرى ماتِتْ
منْ زمنْ
أيوه